وطن لاءِ قرباني کي پگهار سان ڳنڍڻ اخلاقي بيحسي آهي، خواجا آصف جي فضل الرحمان جي بيان تي تنقيد

اسلام آباد: وفاقي بچاءَ واري وزير خواجا آصف جمعيت علماءِ اسلام (ف) جي سربراهه مولانا فضل الرحمان جي بيان تي تنقيد ڪندي چيو آهي ته فوجي جوانن جي وطن لاءِ قرباني کي پگهار سان ڳنڍڻ غيرمنصفاڻو عمل آهي ۽ اهو شهيدن ۽ سندن وارثن جي دل آزاري جي برابر آهي.

پنهنجي بيان ۾ خواجا آصف چيو ته مولانا فضل الرحمان هڪ تجربيڪار سياستدان ۽ ممتاز مذهبي اڳواڻ آهن، تنهن ڪري انهن کان لفظن جي چونڊ ۾ وڌيڪ ذميواري جي اميد ڪئي ويندي آهي.

هن چيو ته ڪو به شخص رڳو پگهار خاطر پنهنجي قيمتي جان قربان نٿو ڪري. جان جي قرباني جي پويان ڪنهن نه ڪنهن نظريي، عقيدي، فرض يا وطن سان گهري وابستگي هوندي آهي.

خواجا آصف وڌيڪ چيو ته حالتن، واقعن يا طريقه ڪار سان اختلاف ڪري سگهجي ٿو، پر وطن سان محبت، وابستگي ۽ قرباني جي جذبي جي توهين نٿي ڪري سگهجي. سندس چوڻ هو ته ملڪ ۾ دهشتگردي خلاف جنگ جاري آهي، جنهن دوران پاڪ فوج سميت ٻين ادارن جا جوان ۽ شهري مسلسل شهيد ٿي رهيا آهن.

هن چيو ته انهن قربانين کي صرف پگهار جو نتيجو قرار ڏيڻ سياسي تنقيد نه، پر اخلاقي بيحسي آهي. خواجا آصف موجب مولانا فضل الرحمان جي بيان سان رڳو هڪ اداري نه، پر هزارين شهيدن، غازين، بيوه عورتن ۽ يتيم ٻارن جي جذبن کي به مجروح ڪيو ويو آهي.