اداڪارا ميرا سيٺي چيو آهي ته مٿس شادي ڪرڻ لاءِ ڪو به سماجي دٻاءُ نه هو ۽ هوءَ هن معاملي ۾ ڪنهن کي به الزام نٿي ڏئي سگهي.

تازو ئي ميرا سيٺي اداڪار ۽ گلوڪار احمد علي بٽ کي انٽرويو ڏنو، جنهن ۾ هن پنهنجي ڪيريئر سان گڏ ذاتي زندگي بابت به ڳالهايو.

اداڪارا ميزبان جي سوال جو جواب ڏيندي چيو ته طلاق کان پوءِ هن سڀ کان پهريون سبق اهو سکيو ته پنهنجي دل جي آواز يا جذبن تي انڌو اعتماد نه ڪرڻ گهرجي ۽ نه ئي ڪنهن جي خاطر پنهنجي شخصيت تبديل ڪرڻ گهرجي.

هن چيو ته ڀلي اهو توهان جو مڙس هجي، دوست هجي، مرد باس هجي يا ڪو ٻيو، ماڻهن کي اهو تمام گهڻو پسند ايندو آهي جڏهن توهان انهن جي خاطر پاڻ کي تبديل ڪندا آهيو، پر اها سٺي ڳالهه ناهي. اهي ٻه اهم سبق آهن جيڪي مون سکيا.

ميرا سيٺي چيو ته هن زندگي مان ڀرپور لطف ورتو، گهڻو ڪجهه سکيو ۽ سندس شخصيت ۾ پختگي آئي. هاڻي هوءَ اهو سڀ ڪجهه ان ڪري چئي سگهي ٿي، ڇاڪاڻ⁠تہ سندس طلاق کي ڪيترائي سال گذري چڪا آهن ۽ هوءَ زندگي ۾ اڳتي وڌي چڪي آهي. هن وڌيڪ چيو ته جڏهن ڪا عورت حالتن موجب پاڻ کي بدلائڻ کان انڪار ڪندي آهي ته ماڻهو اڪثر چوندا آهن ته "هيءَ ايڊجسٽ نه ٿي سگهي."

هن وڌيڪ چيو ته مٿس شادي ڪرڻ لاءِ ڪنهن به قسم جو سماجي دٻاءُ نه هو. هن اهڙي عمر ۾ شادي ڪئي، جنهن کان پوءِ معاشرو عام طور شادي مناسب سمجهي ٿو. اها مڪمل طور سندس پنهنجي مرضي، محبت ۽ مثالي سوچ تي ٻڌل فيصلو هو، تنهن ڪري هوءَ هن معاملي ۾ پنهنجي ذات کان سواءِ ڪنهن ٻئي کي ذميوار نٿي ٺهرائي سگهي.

واضح رهي ته ميرا سيٺي 2019ع ۾ آمريڪي رياست ڪيليفورنيا ۾ بلال صديقي سان شادي ڪئي هئي، جڏهن ته ٻنهي 2023ع ۾ الڳ ٿيڻ جو فيصلو ڪيو.