ڪراچي: سنڌ جي سينيئر وزير شرجيل ميمڻ چيو آهي ته پيپلز پارٽي جي ملڪ جي خدمت جو ڪو مثال نٿو ملي، پاڪستان کي ايٽمي طاقت بڻائڻ به پيپلز پارٽي جي مهرباني آهي

ڪراچي ۾ ميڊيا سان ڳالهائيندي شرجيل ميمڻ چيو ته پيپلز پارٽي ئي عوامي مينڊيٽ سان حڪومت ۾ اچي ٿي ۽ حڪومت ۾ اچي عوامي خدمت جا ڪم ڪري ٿي.

هن چيو ته ايندڙ مهيني ڊبل ڊيڪر بسن جو وڏو انگ ڪراچي پهچي ويندو، جڏهن ته اي وي ٽيڪسيون پڻ اچي رهيون آهن. 500 اي وي بسن جي منظوري ٿي چڪي آهي، جڏهن ته پنڪ اسڪوٽيز پڻ جلد شهرين لاءِ دستياب ٿينديون.

صوبائي وزير ٻڌايو ته يونيورسٽي روڊ تي ڪوريڊور جو 80 کان 85 سيڪڙو ڪم مڪمل ٿي چڪو آهي. هن چيو ته هن وقت يونيورسٽي روڊ تي ٽريفڪ جي رواني ۾ ڪو مسئلو ناهي ۽ يونيورسٽي روڊ 15 سيپٽمبر تائين 100 سيڪڙو مڪمل ٿي ويندو.

شرجيل ميمڻ جو چوڻ هو ته ڪوئلي مان سستي بجلي پيدا ڪري سگهجي ٿي ۽ ٿرپارڪر ۾ ڪوئلي جا ذخيرا موجود آهن. سندس چوڻ موجب ٿرپارڪر جي ڪوئلي سان سڄي پاڪستان جا بجلي پلانٽ هلي سگهن ٿا.

هن وڌيڪ چيو ته پيپلز پارٽي واحد جماعت آهي جنهن ملڪ جي جيڪا خدمت ڪئي، ان جو مثال نٿو ملي، جڏهن ته پاڪستان کي ايٽمي طاقت بڻائڻ به پيپلز پارٽي جي مهرباني آهي.