تحريڪ تحفظ آئين پاڪستان پارليامينٽ جو گڏيل اجلاس گهرائي بلوچستان، آزاد ڪشمير ۽ ملڪ جي سلامتي واري صورتحال تي بحث ڪرائڻ جو مطالبو ڪيو آهي.

اسلام آباد ۾ گڏيل پريس ڪانفرنس ڪندي قومي اسيمبلي ۾ اپوزيشن اڳواڻ محمود خان اچڪزئي زيارت واقعي جي جاچ ۽ ذميوارن خلاف ڪارروائي جو مطالبو ڪيو.

ان موقعي تي محمود خان اچڪزئي چيو ته ٻين ملڪن ۾ اهڙن واقعن کان پوءِ وزير استعيفائون ڏئي ڇڏيندا آهن. هن چيو ته کين آزاد ڪشمير وڃڻ کان روڪيو ويو، جڏهن ته هو پنهنجي ڪشميري ڀائرن سان ڳالهائڻ چاهيندا هئا.

پريس ڪانفرنس ۾ شريڪ سردار اختر مينگل چيو ته مسئلن جو حل سياسي ڳالهين ۾ آهي ۽ سياست ۾ برداشت جي گنجائش هجڻ گهرجي.

هوڏانهن سينيٽ ۾ اپوزيشن اڳواڻ علامه راجا ناصر عباس چيو ته ملڪ ۾ سياسي ۽ سلامتي جو بحران شدت اختيار ڪري چڪو آهي ۽ عوام ۾ مايوسي وڌندي پئي وڃي.