اسلام آباد: پيٽروليم شعبي جي مرحليوار ڊي ريگيوليشن تحت ڊيزل سستو ڪرڻ جي تياري ڪئي وئي آهي
هاءِ اسپيڊ ڊيزل جو ڪريڪ اسپريڊ 70 کان گهٽائي 35 کان 40 ڊالر في بيرل ڪرڻ جي تجويز ڏني وئي آهي، پهرين مرحلي ۾ پيٽرول کي ڊي ريگيوليٽ ڪيو ويندو، پوءِ ٻين پيٽروليم شين کي به هن نظام ۾ شامل ڪيو ويندو.
آءِ ايف اي ايم (IFEM) سڌارن تحت پيٽروليم ڊپو پوائنٽن جو انگ 22 مان گهٽائي 11 ڪرڻ جي سفارش ڪئي وئي آهي.
حڪومت جي پيٽروليم پرائسنگ ڪميٽي ايندڙ ٻن هفتن دوران وزيراعظم شهباز شريف کي پيٽروليم شعبي جي مرحليوار ڊي ريگيوليشن بابت سفارشون پيش ڪرڻ واري آهي، جنهن تحت صارفين کي فوري رليف ڏيڻ لاءِ هاءِ اسپيڊ ڊيزل (HSD) جي قيمت ۾ نمايان گهٽتائي جو امڪان آهي.
ان مقصد لاءِ ڊيزل جي عالمي ڪريڪ اسپريڊ ۾ گهٽتائي ڪئي ويندي، جڏهن ته ٻئي طرف پيٽرول جي قيمتن کي تدريجي طور حڪومتي ڪنٽرول کان آزاد ڪيو ويندو.
ڪميٽي جي خميس واري اجلاس کان آگاهه اختيارين موجب حڪومت هاءِ اسپيڊ ڊيزل جي ڪريڪ اسپريڊ کي موجوده لڳ ڀڳ 70 ڊالر في بيرل مان گهٽائي 35 کان 40 ڊالر في بيرل ڪرڻ تي غور ڪري رهي آهي.
هن قدم سان مقامي مارڪيٽ ۾ ڊيزل جي قيمتن ۾ نمايان گهٽتائي اچڻ جي اميد آهي، جڏهن ته مقامي ريفائنرين جي مالي صلاحيت پڻ برقرار رهندي.
هڪ عهديدار موجب ايندڙ خميس تائين ڪميٽي پيٽروليم شين جي ڊي ريگيوليشن ۽ ڊيزل جي قيمتن ۾ فوري گهٽتائي بابت سفارشون حتمي شڪل ڏئي ڇڏيندي.
