نئين دهلي (ويب ڊيسڪ) وچ اوڀر ۾ جنگ ۽ عالمي مارڪيٽ ۾ ڪچي تيل جي اگهن ۾ واڌ کانپوءِ ڀارت ۾ پيٽروليم شين جي قيمتن ۾ 3 رپيا في ليٽر واڌ ڪئي وئي آهي.

پرڏيهي ميڊيا رپورٽن موجب، پيٽروليم شين جي اگهن ۾ تازي واڌ 4 سالن کانپوءِ ڪئي وئي آهي جنهن بعد پيٽرول جي قيمت 97.77 جڏهن ته ڊيزل 90.67 رپيا في ليٽر ٿي وئي.

ٻئي پاسي مخالف ڌر جي جماعت ڪانگريس پيٽرول جي اگهن ۾ واڌ تي احتجاج ڪندي چيو ته مودي حڪومت پنهنجي چونڊ خرچن جي اوڳاڙي لاءِ عوام تي بنا سبب معاشي بار وڌو آهي.

ڀارت ۾ ٻين سياسي پارٽين به پيٽرول جي قيمتن ۾ 4 سالن کانپوءِ 3 رپين جي واڌ کي رد ڪندي شديد احتجاج ڪيو ۽ روڊن تي نڪري آيون، حڪومت مخالف نعرا هنيا ويا.

سوشل ميڊيا تي به مودي حڪومت کي ڇتي تنقيد جو نشانو بڻايو پيو وڃي، ڪجهه واهپيدارن سوال اٿاريو آهي ته جيڪڏهن تيل جو بحران نه هو ته هاڻي اوچتو قيمتون ڇو وڌايون ويون ۽ اهو به اليڪشن کان ترت پوءِ جنهن سبب شڪ شبها پيدا ٿي ويا آهن.

هوڏانهن بي جي پي حڪومت جو چوڻ آهي ته ايران جنگ ۽ آبناءِ هرمز جي بندش سبب اگهن ۾ واڌ اڻٽر ٿي وئي هئي، ان باوجود به حڪومت ان تاثر کي غلط قرار ڏنو ته ملڪ هن وقت تيل جي بحران جو شڪار آهي.