راولاڪوٽ ۾ هٿياربند جٿن جو سيڪيورٽي فورسز ۽ شهرين تي حملو، هڪ رينجرز اهلڪار شهيد

راولاڪوٽ ۾ اختيارين موجب پابندي مڙهيل جوائنٽ ايڪشن ڪميٽي سان لاڳاپيل مبينا هٿياربند جٿن جي فائرنگ ۾ هڪ رينجرز اهلڪار شهيد ۽ ٻيو زخمي ٿي پيو.

ذريعن موجب اڄ صبح متيال ميره بس ٽرمينل ويجهو مبينا هٿياربند جٿن شهري آبادي تي فائرنگ ڪئي، جنهن کانپوءِ امن امان جي صورتحال برقرار رکڻ لاءِ پوليس اڳتي وڌي ته پوليس کي به نشانو بڻايو ويو.

ذريعن جو چوڻ آهي ته پوليس جي مدد لاءِ مقرر رينجرز جي نفري به واقعي واري هنڌ پهتي، جتي مبينا هٿياربند جٿن جي فائرنگ دوران هڪ رينجرز اهلڪار شهيد ۽ ٻيو زخمي ٿي ويو.

اختيارين موجب علائقي ۾ سيڪيورٽي سخت ڪئي وئي آهي، جڏهن ته واقعي بابت وڌيڪ جاچ جاري آهي.

نوٽ: مٿيون ڄاڻ شروعاتي سرڪاري ذريعن ۽ اختيارين جي بيانن تي ٻڌل آهي، جڏهن ته ٻئي ڌر جو موقف هن وقت سامهون ناهي آيو.