راولپنڊي ۾ مڙس مبينا طور ملازم ۽ پنهنجي پيءُ سان گڏجي زال کي قتل ڪري ڇڏيو، جنهن جو لاش گهر جي غسل خاني مان هٿ ڪيو ويو
پوليس موجب عورت جي قتل جو واقعو ٿاڻي سول لائنز جي علائقي لال ڪرتي ۾ پيش آيو. عورت جو لاش گهر جي غسل خاني مان هٿ ڪيو ويو.
پوليس جو چوڻ آهي ته مقتولا جي شادي 9 مهينا اڳ ٿي هئي، جڏهن ته قتل جي الزام ۾ مقتولا جي مڙس ۽ گهريلو ملازم کي گرفتار ڪيو ويو آهي.
مقدمي جي فريادي موجب لاش جا هٿ پٺيان ٻڌل هئا ۽ وات تي ڪپڙو پڻ ٻڌل هو. مقتولا جي ڀاءُ کي سندس ڀيڻ جي ساهرن جي فون آئي، جنهن کانپوءِ هو گهر پهتو ته ڀيڻ جو لاش غسل خاني ۾ پيل هو. فريادي جو چوڻ آهي ته جوابدارن قتل کي خودڪشي جو رنگ ڏيڻ جي ڪوشش ڪئي.
مقتولا جي ڀاءُ جو چوڻ آهي ته سندس ڀيڻ جو مڙس اڳ به کيس تڪليفون ڏيندو رهيو هو. سندس موجب جوابدار جي اها ٻي شادي هئي، جڏهن ته پهرين زال کيس طلاق ڏئي ڇڏي هئي.
پوليس موجب مقتولا حنا جو پوسٽ مارٽم ڪرايو ويو آهي ۽ رپورٽ جو انتظار آهي. واقعي واري هنڌ تان سمورا ثبوت گڏ ڪيا ويا آهن ۽ واقعي جي سمورن پاسن کان جاچ جاري آهي.
متاثر خاندان مقتولا جي سسر اصغر علي کي پڻ گرفتار ڪرڻ جو مطالبو ڪيو آهي. خاندان جو چوڻ آهي ته مقتولا جو سسر به ڪيس ۾ نامزد آهي، پر اڃا تائين گرفتار ناهي ڪيو ويو. خاندان اميد ظاهر ڪئي آهي ته پنجاب پوليس انصاف لاءِ قانون موجب سمورا قدم کڻندي.
