چين ۾ سمنڊ هيٺ تعمير ڪيل هڪ ڊيٽا سينٽر ڪمرشل آپريشنز جو آغاز ڪري ڇڏيو آهي، جنهن جا سرور ماڊيولز سمنڊ جي اندر ڪم ڪري رهيا آهن۔

هن منصوبي ۾ آف شور ونڊ جنريشن کي پڻ شامل ڪيو ويو آهي ته جيئن زيرِ سمنڊ ڪمپيوٽنگ انفراسٽرڪچر لاءِ بجلي جي ضرورتن کي گهٽائي سگهجي۔

هن کي دنيا جو پهريون زيرِ آب ڊيٽا سينٽر قرار ڏنو ويو آهي، جيڪو شنگهائي ڀرسان ليانگانگ اسپيشل ايريا ۾ تعمير ڪيو ويو، جنهن اندر 2 هزار سرور موجود آهن۔

هي ڊيٽا سينٽر سمنڊ جي سطح کان لڳ ڀڳ 35 ميٽر کوٽائي ۾ موجود آهي۔

چيني اختيارين ۽ هڪ نجي ڪمپني هاءِ ڪلائوڊ ٽيڪنالاجي گڏيل طور تي 22 ڪروڙ 60 لک ڊالر ماليت جو هي ڊيٽا سينٽر تعمير ڪيو آهي۔

هن ۾ موجود سرورز آرٽيفيشل انٽيليجنس ورڪ لوڊز، 5G سروسز ۽ ٻين آپريشنز کي سنڀالڻ جي صلاحيت رکن ٿا۔

روايتي ڊيٽا سينٽرن جي ابتڙ، هن ڊيٽا سينٽر کي ٿڌو رکڻ لاءِ سامونڊي پاڻي استعمال ڪيو ويندو۔

سامونڊي پاڻي سان ڊيٽا سينٽر کي ٿڌو رکڻ سبب توانائي جي استعمال ۾ نمايان گهٽتائي ايندي۔

واضح رهي ته زمين جي سطح تي موجود ڊيٽا سينٽرن کي پنهنجي ڪم لاءِ تمام گهڻي مقدار ۾ بجلي جي ضرورت هوندي آهي۔

موجوده دور ۾ اڪثر ويب سائيٽن ۽ ٻين ايپس لاءِ ڊيٽا سينٽرن تي ڀاڙيو وڃي ٿو، جڏهن ته اي آءِ ۽ ڪلائوڊ ڪمپيوٽنگ جو استعمال تيزي سان وڌي رهيو آهي۔

ڊيٽا سينٽر جڏهن فعال ٿين ٿا ته اهي تمام گهڻي گرمي خارج ڪن ٿا، جنهن سبب انهن کي ٿڌو رکڻ لاءِ ڪولنگ سسٽمز جي ضرورت پوي ٿي، ۽ انهن سسٽمز لاءِ تمام گهڻي توانائي استعمال ٿيندي آهي۔