ڪراچي: ڪراچي جي جناح پوسٽ گريجوئيٽ ميڊيڪل سينٽر ۾ مبينا غفلت ۽ لاپرواهي جو هڪ ٻيو واقعو سامهون آيو آهي، جتي آءِ سي يو ۾ بسترو نه ملڻ سبب حامله عورت گيسٽرو وارڊ ۾ ٻار کي جنم ڏنو، پر ٻار جي پيدائش دوران ماءُ ۽ نئون ڄاول ٻار ٻئي فوت ٿي ويا. اسپتال انتظاميا موجب متاثر عورت گائني وارڊ 9 اي ۾ داخل هئي، پر گيسٽرو جي شڪايت تي کيس گائني وارڊ مان گيسٽرو وارڊ منتقل ڪيو ويو. عورت جي طبيعت خراب ٿيڻ تي گائني وارڊ سان رابطو پڻ ڪيو ويو، جڏهن ته گائني وارڊ ۾ بسترو خالي هجڻ باوجود عورت کي اتي بسترو نه ڏنو ويو. گيسٽرو وارڊ جي ڊاڪٽرن به اهڙو ئي الزام لڳايو آهي. واقعي جي اطلاع ملندي ئي جناح اسپتال ۾ جاچ ڪميٽي جوڙي وئي آهي. قائم مقام ايگزيڪيوٽو ڊائريڪٽر ڊاڪٽر سلمان جو چوڻ آهي ته واقعي جي مڪمل جاچ ڪئي ويندي، ذميوارن جو تعين ڪيو ويندو ۽ غفلت ثابت ٿيڻ جي صورت ۾ ڪارروائي ڪئي ويندي.