بالي ووڊ جي سينيئر اداڪارا ۽ سياسي اڳواڻ هيما مالني ڌرميندر جي وفات کان اڳ سندس آخري پيغام بابت انڪشاف ڪيو آهي. اداڪارا پنهنجي سوتيلي پٽن سني ديول ۽ بوبي ديول سان پنهنجي لاڳاپن بابت به ڳالهايو. تازو ئي هڪ ڀارتي ميڊيا اداري کي ڏنل انٽرويو ۾ 78 ورهين جي هيما مالني پنهنجي مرحوم مڙس جي وفات کان اڳ خاندان لاءِ ڏنل آخري پيغام جو ذڪر ڪيو. اداڪارا چيو ته هن وفات کان اڳ چيو هو ته "هميشه خاندان سان گڏجي رهو، ڀلي ڪهڙو به ڪم هجي، خاندان کي هميشه اهميت ڏيڻ گهرجي." سني ۽ بوبي ديول بابت هيما مالني چيو ته "بوبي ۽ سني ٻئي تمام سٺا پٽ آهن، اسين سڀ هميشه گڏ رهندا آهيون، اسين پنهنجن خانداني ڳالهين جي تشهير ناهيون ڪندا، اسان جي وچ ۾ مضبوط رشتو ۽ گهرو تعلق آهي، ڌرميندر کي به ڪڏهن پنهنجي ذاتي زندگي ۽ خانداني معاملن کي عوام آڏو آڻڻ پسند نه هو." ياد رهي ته هندي سينيما جي سينيئر اداڪار ڌرميندر گذريل سال 24 نومبر تي 89 ورهين جي عمر ۾ لاڏاڻو ڪري ويو هو. ڌرميندر ۽ هيما مالني جي پهرين ملاقات 1960ع واري ڏهاڪي جي آخر ۾ گڏ فلمن ۾ ڪم ڪرڻ دوران ٿي هئي.